Azərbaycan Milli Konservatoriyasında “Muğamın Xan zirvəsi” – Xan Şuşinskiyə həsr olunmuş tədbir keçirilib

Xatirə otağının açılış mərasimində Azərbaycan Respublikasının mədəniyyət nazirinin müavini Murad Hüseynov, Yasamal Rayon İcra Hakimiyyətinin başçısı Elşad Həsənov, YAP Yasamal rayon təşkilatının sədri Bəxtiyar Nəbiyev, Azərbaycan Respublikasının siyasi dövlət xadimi, diplomat, tarix elmləri doktoru Həsən Həsənov, Azərbaycan Dövlət Musiqi Mədəniyyəti Muzeyinin direktoru Alla Bayramova, yazıçı, publisist Mustafa Çəmənli, Milli Kitabxananın direktoru Kərim Tahirov, Xan Şuşinskinin övladı, Xan Şuşinski Fondunun prezidenti Bəyimxanım Verdiyeva, mədəniyyət və incəsənət xadimləri, Azərbaycan Milli Konservatoriyasının rəhbərliyi, professor-müəllim heyəti, media nümayəndələri iştirak ediblər.

Açılış mərasimində Azərbaycan Milli Konservatoriyasının rektoru, sənətşünaslıq doktoru, professor Kamilə Dadaş-zadə qonaqları salamlayaraq bu günün Azərbaycan Milli Konservatoriyası üçün mühüm və əlamətdar olduğunu bildirib. O, xatirə otağı haqqında, məlumat verərək qeyd edib ki, burada Xan Şuşinskiyə məxsus afişalar, şəkillər və kitablar sənətkarın yaradıcılıq yolunu əks etdirir.

Çıxış edən Xan Şuşinski Fondunun rəhbəri Bəyimxanım Verdiyeva 18 mart tarixinin sənətkarın anım günü olduğunu dilə gətirib və göstərilən diqqətə görə ailəsi adından təşəkkürünü bildirib. Ardınca “Muğam” kafedrasının müdiri, Xalq artisti, professor Mənsum İbrahimov çıxışında hər kəsi salamlayıb və bildirib ki, Xan Şuşinski Şərqin böyük xanəndəsidir. Onun şəxsiyyəti, ifası, əxlaqı, musiqiyə yanaşması Azərbaycan xanəndələri üçün bir nümunədir.Xaıq artisti çııxışının sonunda Xatirə otağının kafedranın tələbələri üçün çox böyük əhəmiyyəti olacağını dilə gətirib.

Xatirə otağının açılışından sonra Fikrət Əmirov adına zalda konsert proqramı təqdim olunub.

Konsertdən öncə Azərbaycan Respublikasının mədəniyyət nazirinin müavini Murad Hüseynov çıxış edərək bu cür tədbirlərin Azərbaycanın musiqi təhsilində əhəmiyyətindən bəhs edib, Azərbaycan musiqi mədəniyyətinin inkişaf yolu haqqında danışıb.

AMK-nın rektoru Kamilə Dadaş-zadə Xan Şuşinski yaradıcılığının təkrarsız olmağından, sənətkarın Azərbaycan musiqi tarixində rolundan bəhs edib, bugünkü tədbirin “Miras” layihəsi çərçivəsində keçirildiyini bildirib. O qeyd edib ki, “Miras” layihəsinin missiyalarından biri Azərbaycan musiqi sənətində müstəsna xidmətləri olan sənətkarların yaradıcılığına diqqət yetirməkdir.

Xan Şuşinski yadigarı Bəyimxanım Verdiyeva çıxışında Azərbaycan Respublikası Mədəniyyət Nazirliyinə, Azərbaycan Milli Konservatoriyasına və ölkə rəhbərliyinə təşəkkürünü ifadə edib.

Konsert proqramının bədii hissəsində Xalq artistləri Mənsum İbrahimov, Elçin Həşimov, Əməkdar artistlər Elnur Əhmədov, Emil Əfrasiyab, “Azərbaycan xanəndəlik sənətinin böyük ustadı Xan Şuşinski” adlı kitabın müəllifi Bəyimxanım Vəliyeva, Əməkdar müəllim Naibə Şahməmmədova, bəstəkar Pikə Axundova, xanəndə Aytən Məhərrəmova, pianoçu Zərrin Muradova, həmçinin muğam müsabiqəsi laureatları, tələbələr Ülkər Abdullayeva, Mirəli Sarızadə, Azər Çələbiani, Asim Muradov, Xan Şuşinskinin nəticəsi, pianoçu Fərid Hüseynov, Aytac Bəybalayeva, Kənan Dəva, Nərmin Mirzəyeva, Siyavuş Kərimov və Səyyar Teymurovun ifaları təqdim olunub.

Proqram çərçivəsində bir yenilik olaraq Xan Şuşinski yaradıcılığından nümunələr yeni interpretasiyada təqdim olunub, AMK-nın tələbələrindən ibarət vokal ansamblının ifası, xalq musiqisi nümunələri səsləndirilib.

Konsertə AMK-nın Elm, Yaradıcılıq və Beynəlxalq Əlaqələr Mərkəzinin yaradıcılıq məsələləri üzrə mütəxəssisi Zeynəb Bağır aparıcılıq edib.