Azərbaycan Milli Konservatoriyasındə “Sərhədləri aşan Azərbaycan muğamı” beynəlxalq simpoziumuna start verilib

Azərbaycan Milli Konservatoriyasının rektoru, sənətşünaslıq doktoru, professor, Əməkdar incəsənət xadimi Kamilə Dadaş-zadə və SOAS London Universitetinin professoru Reyçel Harris çıxış edərək simpoziumu açıq elan ediblər.

Simpoziumun birinci günü “Məqamın tədqiqində innovativ yanaşmalar” mövzusunda plenar iclasla davam edib.

Keçirilən plenar iclasa Azərbaycan Milli Konservatoriyasının elm, innovasiya və yaradıcılıq məsələləri üzrə prorektoru, Əməkdar incəsənət xadimi, professor Lalə Hüseynova sədrlik edib.

İclasda SOAS London Universitetinin professoru Reyçel Harris “Sovet-Çin ayrılığı boyunca musiqi qarşılaşmaları”, AMK-nın müəllimi, Səsin Tədqiqi Elmi Laboratoriyasının rəhbəri Sevinc Sultanzadə (Aleksandriya Sultan von Brüseldorff) “XXI əsrdə Azərbaycan muğamında vokal kanonun qorunması: şifahi ənənənin müasir vokal elmi və pedaqogikası ilə inteqrasiyası”, SOAS London Universitetinin tədqiqatçıları Polina Dessyatniçenko və Səid Kordmafi “Müasir muğam yaradıcılığı və onun Azərbaycan musiqiçilərinin diskurslarında İran klassik musiqisi ilə əlaqələri” mövzularında məruzələrlə çıxış ediblər.

Açılış mərasimində Azərbaycan Milli Konservatoriyasının tələbələrindən ibarət “Miras” qədim musiqi alətləri ansamblının konsert proqramı təqdim olunub ( ansamblın bədii rəhbəri sənətşünaslıq üzrə fəlsəfə doktoru Pikə Axundova, alətlərin bərpası və təkmilləşdirilməsi üzrə mütəxəssis sənətşünaslıq üzrə fəlsəfə doktoru Məmmədəli Məmmədovdur, solistlər Aytac Bəybalayeva, Kənan Dəva)

Simpozium öz işini Azərbaycan Milli Konservatoriyasının “Bakı” zalında “Fəlsəfə, poeziya və əruz” mövzusunda panel iclasla davam etdirib. Panel iclasına Polina Dessyatniçenko sədrlik edib.

Əsas məruzə ilə Fransa Milli Elmi Tədqiqatlar Mərkəzinin (CNRS) professoru Jan Dürinq çıxış edib. O, “Dəstgah və məqam sistemlərinin müqayisəsi və improvizasiya xüsusiyyətləri” mövzusunda məruzə təqdim edib.