Pekində 28 May – Müstəqillik Gününə həsr olunmuş, Azərbaycan Respublikasının Çin Xalq Respublikasındakı Səfirliyinin təşkilatçılığı və Heydər Əliyev Fondunun dəstəyi ilə keçirilən rəsmi qəbulda Azərbaycan Milli Konservatoriyasının “Populyar musiqi və caz ifaçılığı” kafedrasının müdiri, Əməkdar artist, Prezident mükafatçısı Emil Əfrasiyab, AMK-nın “Xalq çalğı alətləri” kafedrasının müəllimi, Xalq artisti Ənvər Sadıqov, Əməkdar artistlər Ələkbər Ələkbərov və İsgəndər Ələsgərov, eləcə də bas-gitara ifaçısı, Vətən müharibəsi veteranı Elvin Nəbiyev çıxış ediblər.
Çin rəsmiləri, diplomatik missiyaların nümayəndələri və ictimaiyyət təmsilçilərinin iştirak etdiyi rəsmi qəbulun bədii hissəsində sənətkarlar Azərbaycan musiqisinin zəngin ifaçılıq ənənələrini və müasir improvizasiya çalarlarını əks etdirən rəngarəng konsert proqramı təqdim ediblər.
