“Mirasdan müasirliyə” hesabat konserti tamaşaçılar tərəfindən maraqla qarşılanıb

Konsert proqramı bir il ərzində Azərbaycan Milli Konservatoriyası ilə Müslüm Maqomayev adına Azərbaycan Dövlət Akademik Filarmoniyasının birgə təşkilatçılığı ilə həyata keçirilmiş “Nəsillərin dialoqu” layihəsinin yekun tədbiri və AMK nın müəllim və tələbələrinin konserti kimi təqdim edilib.

Tədbirdə Azərbaycan Milli Konservatoriyasının rektoru, Əməkdar incəsənət xadimi, sənətşünaslıq doktoru, professor Kamilə Dadaş-zadə çıxış edərək hesabat konserti barədə məlumat verib. Rektor “Mirasdan müasirliyə” layihəsinin milli musiqi irsinin qorunması, ifaçılıq ənənələrinin yaşadılması və müasir sənət düşüncəsi ilə təqdim olunması baxımından əhəmiyyətini vurğulayıb.

Musiqili proqramda ilk olaraq dahi bəstəkar Ü. Hacıbəylinin “Cəngi” əsəri ifa edilib. Dirijorlar Ellada Məmmədova və Aysel Bağırovanın rəhbərliyi, Azərbaycan Milli Konservatoriyasının tələbələrindən ibarət Xalq Çalğı Alətləri Orkestrinin müşayiəti ilə Xalq artisti Ənvər Sadıqov və tələbələri, Mənsum İbrahimov, Elçin Həşimov, Əməkdar artistlər Elnur Əhmədov, Emil Əfrasiyab, Təyyar Bayramov, Bəyimxanım Vəliyeva, Ramil Qasımov, Zenfira İsmayılova, Fəridə Məmmədova və tələbələri, Salman Qəmbərov, Pikə Axundova, İbrahim Babayev və tələbələri, eləcə də Arifə İmanova, Nurəddin Tağıyev, “Naz” vokal ansamblı, Mədinə Şahgəldiyeva, Taleh Yahyayev, Leyla Abdulrəhimova, Natavan Həsənova, Surə Rufət Həsənli, Cəlalə İsmayılzadə və baş müəllim Svetlana Əhmədova çıxış ediblər.

Konsert proqramında konsertmeysterlər Ağarəhim Salah və Zərrin Muradova, zərb alətləri ifaçıları Siyavuş Kərimov və Səyyar Teymurov, “Naz” vokal ansamblı (bədii rəhbər: Xanımana Məmmədzadə), Konservatoriyanın tələbələrindən ibarət xor kollektivi (bədii rəhbər və dirijor: Əməkdar müəllim Təranə Yusifova), eləcə də Tamara Nəhmədova iştirak ediblər.