08 aprel 2026-cı il tarixində Azərbaycan Milli Konservatoriyasının Fikrət Əmirov adına Böyük Zalında “İnstrumental muğam” kafedrasının professor,müəllim və tələbələrinin iştirakı ilə “Dəraməd və rənglərimiz” adlı konsert keçirilib.
Konsertdə xalq artistləri, professorlar Ağasəlim Abdullayev, Fəxrəddin Dadaşov, Möhlət Müslümov, Malik Mansurov,Elçin Həşimov,tarzən Murtuza Əsədullayev, əməkdar artist,dosent Elnur Əhmədov, əməkdar artist, baş müəllim Şirzad Fətəliyev, baş müəllimlər Rövşən Qurbanov və Aysu Sadıqova, müəllimlər Arifə İmanova, Rəşad İbrahimov, Rüstəm Müslümov, Əkbər Osmanov, eləcə də ifaçılar Siyavuş Kərimov, Səyyar Teymurov, Fidən Hacıəliyeva, Dəniz Məmmədli, Fatimə Tahirova, Kəmalə İsakova, Leyla Tağıyeva və Nihad Kamilli iştirak ediblər.
Proqramın zəngin repertuarında “Vilayəti-dilkəş”, “Bayatı-Şiraz”, “Mirzə Hüseyn Segahı”, “Mahur”, “Şur”, “Segah”, “Şahnaz” və “Zabul” muğamlarının dəraməd və rəngləri ustad və tələbələrin ifasında yüksək yaradıcılıq peşəkarlığı ilə səsləndirilib.
Gurultulu alqış sədaları altında davam edən tədbirin sonunda Azərbaycan Milli Konservatoriyasının Elm, innovasiya və yaradıcılıq məsələləri üzrə prorektoru, Əməkdar incəsənət xadimi, professor Lalə Hüseynova çıxış edərək təqdim olunan konsert proqramına yüksək qiymət verib, bu istiqamətdə yaradıcılıq ənənələrinin davamlılığının vacibliyini vurğulayıb və instrumental muğam kafedrasının ustad sənətkarlarına təşəkkürünü ifadə edib.
Daha sonra “İnstrumental muğam” kafedrasının müdiri, Azərbaycan Respublikasının xalq artisti Malik Mansurov və tədbirə qonaq qismində qatılmış Əməkdar incəsənət xadimi, sənətşünaslıq üzrə fəlsəfə doktoru Sənubər Bağırova çıxış edərək tədbirin əhəmiyyəti ilə bağlı fikirlərini bildiriblər.
Tədbirə Elm, yaradıcılıq və beynəlxalq əlaqələr mərkəzinin yaradıcılıq işləri üzrə mütəxəssisi Zeynəb Bağır aparıcılıq edib.
