Azərbaycan Milli Konservatoriyası
2000-ci ilin 13 iyun tarixli qərarı ilə Azərbaycan Milli Konservatoriyasının təsis edilməsi barədə qərar qəbul edilmişdir. Azərbaycanın milli musiqisinin gələcək inkişafı naminə imzalanmış bu fərmandan bir il sonra, Prezident Heydər Əliyevin 10 avqust 2001-ci ildə Azərbaycan Milli Konservatoriyasının maddi-texniki bazasının yaradılması haqqında geniş sərəncam imzalanmışdır. Sərəncama əsasən, AMK-nın yaradıcısı və rektoru bəstəkar, Xalq artisti Siyavuş Əşrəf oğlu Kərimi təyin olunmuşdur (10.08.2001 – 27.10.2024).
AMK 2014-cü ildə yeni bina ilə təmin olunmuşdur. Qeyd etmək lazımdır ki, açılışda ölkə başçısı Prezident İlham Əliyev və birinci xanım Mehriban Əliyeva iştirak etmişlər.
27.10.2024-cü ildə Prezident İlham Əliyevin sərəncamına əsasən, Azərbaycan Milli Konservatoriyasının rektoru vəzifəsinə Sənətşünaslıq doktoru, Əməkdar incəsənət xadimi Kamilə Dadaş-zadə təyin olunmuşdur.
Azərbaycan Milli Konservatoriyası, milli musiqi təhsilimizin inkişafı naminə yaradılmışdır. AMK sıradan bir təhsil ocağı deyil.Bu təhsil ocağında uluların bizə miras qoyduğu qədim sənətin davamçıları yetişdirilir. AMK-da Azərbaycan mədəniyyətində öz dəst-xətti olan sənətkar və müəllim-professor heyəti fəaliyyət göstərir. Bu sənətkarların hər biri zəngin musiqi irsimizin tanınmış nümayəndələridir.
Azərbaycan Milli Konservatoriyasının tərkibində olan təhsil ocaqları bunlardır: İncəsənət gimnaziyası, Musiqi kolleci və Sumqayıt Musiqi Kolleci.
AMK-da “İfaçılıq” və “Musiqi Tarixi və Nəzəriyyəsi” fakültələri fəaliyyət göstərir. Muğam (xanəndə), Etnomusiqişünaslıq, Fortepiano, Xalq Çalğı Alətləri, İnstrumental Muğam, Populyar Musiqi və Caz, Milli Vokal, Dirijorluq, Humanitar Fənlər, Musiqinin Tarixi və Nəzəriyyəsi kafedraları da burada fəaliyyət göstərir.
AMK-nın tərkibində Konservatoriya Elmi jurnalı təsis olunur. Dərgidə Azərbaycan, İngilis, türk, rus və başqa dillərdə məqalələr dərc olunur.
Azərbaycan Milli Konservatoriyası Azərbaycan mədəniyyətində böyük tarixi əhəmiyyəti olan milli musiqimizin, musiqi ənənələrinin qorunması və inkişafı naminə fəaliyyət göstərən sənət məbədidir.