Fərdin İlham Məhəmmədzadə
ORCİD: 0000-0001-6384-7899
Fərdin İlham Məhəmmdəzadə musiqişünas, pianoçu, Azərbaycan Milli konservatoriyasının “Etnomusiqişünaslıq” kafedrasının müəllimi, Tələbə Elmi Cəmiyyətinin rəhbəridir.
Fərdin Məhəmmədzadə Bakı şəhərində ziyalı ailəsində anadan olmuşdur. 1999-cu ildə Vaqif Mustafazadə adına 2 saylı incəsənət məktəbinin fortepinao sinfinə, 2007-ci ildə isə Azərbaycan Milli Konservatoriyasının nəzdində Musiqi kollecinin “Nəzəriyyə” şöbəsinə daxil olub. 2011-ci ildə Kolleci fərqlənmə ilə bitirərək Üzeyir Hacıbəyli adına Bakı Musiqi Akademiyasının Tarix-nəzəriyyə fakültəsinin Musiqişünaslıq ixtisasına daxil olub və 2015-ci ildə oranı musiqişünaslıq ixtisası üzrə fərqlənmə diplomu ilə bitirmişdir. Həmin ildə AMK-nın muğamşünalıq ixtisasına üzrə magistr pilləsinə daxil omuş və 2017-ci ildə fərqlənmə ilə bitirmişdir. Təhsilinin ilk illərindən müxtəlif Beynəlxalq və Respublika üzrə müsabiqə, konfrans və layihələrdə fəal iştirak edir.
2010-cu ildə keçirilən “Hisslərin harmoniyası” adlı layihədə Diplomla təltif olunmuş, 2012 ci ildə “N.Gəncəvi 870, Niyazi 100, F.Əmirov 90” mövzusunda elan olunmuş “Sərbəst yazı işi” müsabiqəsində II yerə layiq görülmüşdür. Eyni zamanda Heydər Əliyevin 90 illik yubileyinə həsr olunan Respublika müsabiqəsində “Heydər Əliyevin Azərbaycanda elm, təhsil, musiqi mədəniyyətinin inkişafında rolu” mövzusuyla çıxış etmişdir. 2014 cü ildə Azərbaycan Respublikası Prezidenti yanında Gənclər fondunun keçirdiyi “Mədəni Gənc” layihəsində yeganə musiqişünas kimi Sertifikatla təltif olunmuşdur.
Təhsil müddəti boyu ictimai faliyyəti, təhsildə göstərdiyi nəaliyyət və uğurlarına görə “Üzeyir Hacıbəyli” adına xüsusi adlı təqaüdə layiq görülmüşdür.
Mütəmadi olaraq müxtəlif qəzet və jurnallarda elmi və publisistik məqalələrlə, həmçinin Mədəniyyət, İctimai kanallarda musiqiyə, muğama dair çıxışlar edir.
Musiqişünaslıq fəaliyyəti ilə paralel olaraq pinoçu kimi də Azərbaycanda və bir sıra ölkələrdə konsert proqramları ilə çıxışlar edir.
2016-cı ildən Azərbaycan Televiziyası – Mədəniyyət kanalında “Musiqi və əyləncəli proqramlar” redaksiyasında musiqi redaktoru kimi, 2017-ci ildən isə AMK-da “Milli musiqinin tədqiqi” elmi-tədqiqat laboratoriyasında kiçik elmi işçi vəzifəsində çalışıb. Hazırda isə 2021-ci ildən AMK-nın “Etnomusiqişünaslıq” kafedrasının müəllimidir.
Tələbə Elmi Cəmiyyəti
Tələbə Elmi Cəmiyyəti (bundan sonra – TEC) Azərbaycan Milli Konservatoriyasının elmi tədqiqat və elmi-təşkilati işlərində fəal iştirak edən, ali təhsil pilləsinin bakalavriat və magistratura səviyyələrində təhsil alan tələbələrin könüllü ictimai təşkilatıdır. TEC ali təhsil müəssisəsinin rəhbərliyinə tabedir və müəssisənin Elmi Şurası qarşısında hesabat verir.
TEC-in əsas məqsədi ali təhsilli mütəxəssislərin hazırlanmasının keyfiyyətinin yüksəldilməsinə yönəldilmiş elmi-təşkilati tədbirlərin həyata keçirilməsi, elmi-texniki potensialın qorunub saxlanılması və təhsilalanların elmi tədqiqat fəaliyyətinin yeni sosial-iqtisadi şəraitə uyğunlaşdırılmasında ali təhsil müəssisələrinin işinə kömək etməkdən ibarətdir.
TEC-in vəzifələri aşağıdakılardır: tələbələrin elmi tədqiqat fəaliyyətinə cəlb edilməsi və bu fəaliyyətin təşkil olunması; elm, təhsil və təcrübənin vəhdəti prinsipinə əsaslanaraq tələbələr arasında elmi yaradıcılığın müxtəlif formalarının təbliğ edilməsi, həmin formalara və fundamental tədqiqatların aparılmasına gənclərin marağının artırılmasına köməklik göstərilməsi; tələbələrdə tədqiqatçılıq fəaliyyətinə və elmi metodların öyrənilməsinə motivasiyanın yaradılması, tədris materiallarının dərindən və yaradıcı şəkildə mənimsənilməsinə köməklik göstərilməsi; tədqiqatçılıq fəaliyyətinin köməyi ilə tələbələrdə seçilən peşəyə yaradıcı münasibətin formalaşdırılması; istedadlı gənclərin məqsədyönlü şəkildə elmi tədqiqat və elmi-təşkilati işinə cəlb edilməsi; elmi və elmi-pedaqoji kadr hazırlığı sistemi üçün perspektivli gənclərin seçilməsi və onların tədqiqatçılıq fəaliyyətinə hazırlanması; digər ali təhsil müəssisələrinin TEC-ləri ilə əməkdaşlığın həyata keçirilməsi, tələbə elmi tədqiqat işinin təşkilinə dair mütərəqqi müasir forma və metodların tələbələrin elmi tədqiqat işinə tətbiq edilməsi; müxtəlif səviyyəli tədbirlərin – elmi seminar və konfranslar, tələbə elmi işlərinə, habelə kurs, buraxılış, dissertasiya işlərinə baxış müsabiqələri, müxtəlif ixtisas və fənlər üzrə olimpiadalar, diskussiya klubları, simpoziumlar, tanınmış alimlərin seminar və mühazirələrinin dinlənilməsi və s. tədbirlərin təşkili və keçirilməsində tələbələrin iştirakının təmin edilməsi.
Bu mənada Azərbaycan Milli Konservatoriyasında fəaliyyət göstərən Tələbə Elmi Cəmiyyəti də yuxarıda qeyd olunanları rəhbər tutaraq fəaliyyətini davam etdirir.